वेद – दर्शनु

वेद दर्शनु करणु त सवलो आहे ऐं उनते अगरबती बारे नमस्कारु बि सवलो आहे , पर मां तव्हांखां पुछणु चाहींदुसि त छा इनखे वेद दर्शनु चवणु घुरिजे ? हकीक़त में वेदनि खे पढ़णु ऐं समझणु ई वेद-दर्शन जो मतिलबु थियणु घुरिजे । पर असां सिंधी भाउर संस्कृत घटि-वधि समझंदा आहियूँ तहिंकरे असां लाइ वेद पढ़णु ऐं समुझणु कठिनु आहिनि । ईहा हिक हकीक़त आहे ।
मुहिंजा दोस्तो – वेद दर्शन ते लिखणु महा कठिनु आहे , उन लाइ सजी॒ उमिरि वि थोड़ी आहे । वेदनि खे पढ़ी करे समझणु बि पूरी तरह जे मां काबिलु कोन आहियां । ईहा गा॒ल्हि बि मुहिंजे वस जी कान आहे । मां त रुगो॒ तव्हां सभिनी भाउरनि जी शुभु आर्शीवाद ऐं ईश्वर कृपा सां कुझु लिखी करे तव्हांखे वेद दर्शन कराइण जी कोशिशि करे रहियो आहियां ।
महाभारत रचियता श्री वेद व्यास मुनिअ श्रुतियुनि जे आधार ते वेदनि खे चइनि भाङनि में विराहियो आहे । वायू पुराण में लिखियलि आहे त व्दापर युग॒ में वीहनि खां बि वधीक व्यास मुनि थी गुज़िरिया आहिनि । वेदनि जे ज्ञानवान मुनीअ जी उपाधि व्यासु चई वेंदी आहे । तहिंकरे ईहो चवणु ढु॒खियो आहे त कहिड़े काल (समय ) में वेदनि खे चइनि भाङनि में विराहियो वयो आहे । श्रीमद् रामायण या श्री भाॻवत महा पुराण ॿुधाइण वारो जहिं गदीअ ते वेही कथा कंदा आहिनि उनखे हिंदीअ में व्यास-गदी सॾिबो आहे ।
वेदनि में छा लिखियलु आहे , हाणे मां इन बारे में कुझु लिखी रहियो आहियां । पाश्चात्य (विदेशी ) विव्दान प्रो.कैल्टन लिखियो आहे त मैक्समूलर जे वीचारनि मूजिब पहिंजी किताब ( Rigveda & Vedic Religion ) आहे त वेदनि में बा॒राणियूँ ऐं बेमतलबु गा॒ल्हियूँ लिखियल आहिनि । इनहनि सबिबनि जे करे मां उनहनि जे वीचारनि ते कुझु बि लिखणु ठीकु न समुझंदो आहियां । मैक्समूलर सन 1868 हिक ख़त में पहिंजीअ ज़ाल (पत्नीअ ) खे लिखियो आहे त “ मूँखे उमीद आहे त हिन कम (ऋग्वेद लेखन ) खे मां पूरो करे छढींदुसि ………। हिन अनुवाद सां भारत में रहंदरनि किरोड़नि आत्माउनि ते इनजो असरु पवंदो ……..जहिंकरे टिन हज़ारनि सालनि जे असर खे ख़तमु करे सघिबो “ ……) । ( Ref :-धर्मदेव विद्यामारर्तण्ड व्दारा – वेदो में यथार्थ स्वरूप में पृष्ट 25 )
वेद अखर जो मतिलबु आहे ज्ञानु । चइनी वेदनि जा नाला ऐं उनहनि में मंत्रनि जी संख्या हिन नमूने मञी वई आहे ।
1 . ऋग्वेद 10482 मन्त्र
2 . यजुर्वेद 1975 मन्त्र
3 . सामवेद 1873 मन्त्र
4 . अथर्वेद 5977 मन्त्र कुलु मन्त्र 20307
स्वामी दयानंद सरस्वती रो चवणु आहे त वेदनि में परमात्मा जो गु॒झो ज्ञानु भरियलु आहे ,जेको मनुष्य जे कल्याण वास्ते आहे । महिर्षी स्वामी दयानंद ऐं बि॒यनि केतिरनि व्दिवाननि जो त वेदनि जा छ:अंग ऐं छ: उपांग आहिनि । वेदनि जे छहनि भाङनि खे अंग चवंदा आहिनि ऐं उपांग वेदनि में लिखियल ज्ञान जे रक्षा लाइ व्दिवाननि जा ग्रंथ आहिनि ।
अंग हिन नमूने आहिनि :- 1 . शिक्षा 2 .कल्प 3 . ज्योतिषि 4 . सत छंद 5 . व्याकरणु 6. निरूक्त ।
उपांग :- 1 . पूर्व मीमांसा दर्शनु 2 . उतर मीमांसा दर्शनु 3. सांख्य दर्शनु 4 . वैशोषक दर्शनु 5 . न्याय दर्शनु
6 . योग दर्शनु ।
छहनि अंगनि जो परिचय :- 1 . शिक्षा – शिक्षा जो अर्थु आहे त हिन संसार में माणूँह खे जग॒त में कहिरे नमूने रहणु घुरिजे जो हुनजो जीवनु सफलु थी वञे । प्रकृति ऐं समाजि सभिनी लाइ लाभकारी रहणु घुरिजे । हिन जो वर्णननु खा़स यर्जुवेद में चयलु आहे ।
2 . कल्प – कल्प जो अर्थु आहे सृष्टि जी रचना ऐं उनजो प्रलय (अन्तु ) ऐं वरी उनजो पैदा थियणु (उत्पति ) । हिनजो वर्णननु ऋग्वेद में चयलु आहे ।
3 . ज्योतिष – सूर्य ( सिज ) हिन जो वणर्ननु ख़ास करे अथर्व वेद में लिखियलु आहे । सूर्य , ग्रह ऐं नक्षत्रनि जी चालि ( गतिअ ) जी ॼाण ॾिनल आहे ।
वेदनि जा ॿिया अंग छंद , व्याकरण ऐं निरूक्त वणर्ननु शैलीअ जा विषय लिखियल आहिनि । हकीकत में छ (6 ) उपांग मथियनि अंगनि खे तर्कनि ऐं युक्तीअ सां लिखण जो तरीको आहे । हिननि खे तर्कनि सां दर्शन शास्त्रनि सां साबित करण जी कोशिश कयल आहे । पर हिनखे पूर्व मीमांसा में सुठे नमूने समुझायो वयो आहे । न्याय दर्शन में तर्क-वितर्ककरण जो ढंगु चयलु आहे । जॾहिंकि योग दर्शनु मन , ॿुध्दि ऐं शरीर खे स्वस्थ रखण जा तरीका चयल आहिनि ।
Ref : –
गुरूगत । प्रकाशक
हमारी संस्कृतिक धरोहर । हिन्दी साहित्य संस्करण सदन
प्रस्तता – योगेंद्र दत । 1995.

You May Also Like

About the Author: Jairam